Modelu Kontratu Fahe Produsaun (PSC) Timor-Leste

Mapa PSC Timor-Leste

Modelu Kontratu Fahe Produsaun (Production Sharing Contract-PSC) Timor-Leste mak modelu kontratu petrolíferu ida ne’ebé estabelese ho intensaun atu akomoda Timor-Leste nia interese nasionál, iha ne’ebé hakarak esplora nia rekursu naturál sira rasik bazeia ba artigu 139 Konstituisaun Repúblika Demokrátika Timor-Leste ne’ebé afirma katak: “rekursu rai leten nian, rai okos nian, bee territoriál, plataforma kontinentál no zona ekonómiku eskluzivu, ne’ebé importante ba ekonomia, ne’e Estadu nia propriedade ne’ebé tenke utiliza iha forma loloos no hanesan de’it ba ema hotu-hotu, tuir interese nasionál”. Modelu Kontratu Fahe Produsaun (PSC) Timor-Leste kontein dispozisaun detalladas kona-ba fahe produsaun (production split) entre ANPM ho kontratór ne’ebé prevé katak, einjeral 5 %  produsaun petróleu propriedade governu nian no 95% pertense ba propriedade kontratór (Modelu Kontratu Fahe Produsaun artigu 7).

Modelu Kontratu Fahe Produsaun (PSC) ne’ebé Timor-Leste adopta, aplika ba iha área juridisaun rua (2) mak hanesan tuir mai:

1.  Modelu Kontratu Fahe Produsaun Área Dezenvolvimentu Petrolíferu Konjunta (PSC-JPDA).

Modelu Kontratu Fahe Produsaun Área Dezenvolvimentu Petrolíferu Konjunta (Joint Petroleum Development Area -JPDA) maka modelu kontratu petróliferu ne’ebé  aplika ba área konjunta ne’ebé determina ona iha Tratadu Tasi Timor artigu 3 sesaun a. Iha ne’ebé, área refere konjutamente sei kontrola no administra hosi governu Timor-Leste no Australia.

2. Modelu Kontratu Fahe Produsaun Área Eskluziva Timor-Leste (PSC-TLEA).

Modelu Kontratu Fahe Produsaun Área Eskluziva Timor-Leste (PSC-TLEA) mak modelu kontratu petrolíferu ne’ebé aplika ba Timor-Leste nia teritóriu sira ne’ebé determina ona iha Lei Atividade Petrolífera númeru 13/2005.

Autór: Amandio Magno Lopes

Estudante Petroleum Management, DIT