KONTRATU PETROLÍFERU TIMOR-LESTE (PSC-TIMOR-LESTE)

Area JPDA

Kontratu petrolíferu hanesan instrumentu legál ida entre estadu Timor-Leste ho kompañia petrolíferu, iha ne’ebé liu-hosi kontratu refere estadu Timor-Leste permite kompañia petrolíferu atu esplora rezerva petrolífera sira iha Timor-Leste nia teritóriu. Tuir dekretu lei No.7/2005 (2005), artigu 3 sesaun1 hatete katak Kontratu petrolíferu ne'ebé governu Timor-Leste adopta mak Kontratu Fahe Produsaun (Production Sharing Contract-PSC). Kontratu Fahe Produsaun (PSC) maka tipu komun kontratu petrolíferu ne’ebé estabelese entre ANPM (Autoridade Nacional do Petróleo e Minerais) ho Empreza Internasionál Petróleu (International Oil Company-IOC) hodi hala’o atividade petrolífera sira hanesan esplorasaun no produsaun iha  area juridisaun Timor-Leste.

Modelu Kontratu Fahe Produsaun (PSC) ne'ebé implementa iha Timor-Leste, oras ne'e aplika ba área juridisaun diferente rua ho rejime legál no fiskál relevante sira seluk. Modelu kontratu petrolíferu rua ne’e mak; modelu Kontratu Fahe Produsaun Área Eskluziva Timor-Leste (PSC-TLEA) no modelu Kontratu Fahe Produsaun Área Konjunta ba Dezenvolvimentu Petrolíferu (PSC-JPDA). Área Eskluziva Timor-Leste (Timor-Leste Exclusive Area-TLEA) refere ba Timor-Leste nia teritóriu  sira ne’ebé defini ona iha Lei Atividade Petrolífera númeru 13/2005. Enkuantu, Área Dezenvolvimentu Petrolíferu Konjunta (Joint Petroleum Development Area -JPDA) refere ba teritóriu sira ne’ebé defini ona iha Tratadu Tasi Timor artigu 3 sesaun a. Iha ne’ebé, área refere konjutamente sei kontrola no administra hosi governu Timor-Leste no Australia (Timor Sea Treaty, 2003).

Jeralmente, prinsípiu báziku Kontratu Fahe Produsaun (PSC) Timor-Leste nian mak hanesan tuir mai :

1.    Governu Timor-Leste liu hosi Autoridade Dezignada (ANPM) iha direitu eskluziva atu superviziona, kontrola no administra atividade petrolífera hotu. Enkuantu Empreza Internasionál Petróleu (IOC) nu’udar kontratór ne’ebé mak iha responsabilidade atu asume risku finanseiru no teknolojia hotu durante ezekusaun atividade petrolífera.

2.    Governu Timor-Leste mak iha propriedade ba rekursu petróleu no gás. Enkuantu Empreza Internasionál Petróleu (IOC) nu’udar ajente ne’ebé disposta atu fornese asisténsia finansiál no teknika tomak ba operasaun atividade petrolífera no asume mós risku ba kustus operasaun nian.

3.    Títulu propriedade instalasaun, ekipamentus no materiál hotu-hotu pasa ba governu Timor-Leste bainhira akordu kontratuál termina.

4.    Empreza Internasionál Petróleu (IOC) ka kontratór iha obrigasaun atu selu tasa ba governu Timor-Leste bazeia ba rejime tributária ka lei aplikável sira seluk ne’ebé ezisti iha Timor-Leste.

5.    Despeza hotu-hotu ne’ebé Empreza Internasionál Petróleu (IOC) ka kontratór gasta durante atividade petrolífera governu Timor-Leste sei reembolsa fila-fali hafoin halo produsaun petróleu no gás.

6.    Iha área eskluziva (TLEA) aplika estrutura fiskál Obrigasaun Abastesimentu Doméstiku (Domestic Market Obligation-DMO) bazeia ba presu merkadu doméstika. Enkuantu iha área konjunta (JPDA) la aplika estrutura fiskál Obrigasaun Abastesimentu Doméstiku (DMO).

7.    Governu Timor-Leste liu hosi Timor Gap iha direitu eskluziva atu partisipa iha dezenvolvimentu petrolífera iha loron 60 nia laran hafoin halo deklarasaun deskoberta komersiál. Persentajen husi partispasaun estadu Timor-Leste nian masimu to’o porsentu 20 %.

8.    Lukru produsaun (Production Split) sei fahe entre Autoridade Dezignada (ANPM) ne’ebé reprezenta Governu ho Empreza Internasionál Petróleu (IOC) bazeia ba produtu petróleu.
  

Autór: Amandio Magno Lopes

Estudante Petroleum Management, DIT