KONTRATU FAHE PRODUSAUN (PSC)

Barrel Mina-Matak

Kontratu Fahe Produsaun (Production Sharing Contract-PSC) maka tipu komun akordu kontratuál ida ne’ebé estabelese entre governu (Host Government-HG) ho Empreza Internasionál Petróleu (International Oil Company-IOC) hodi hala’o atividade petrolífera sira hanesan esploitasaun no dezenvolvimentu. Johnston (1994), define katak Kontratu Fahe Produsaun (PSC) maka kontratu petrolífera ida entre governu (HG) ho Empreza Internasionál Petróleu (IOC), iha ne’ebé kustus no risku hotu ne’ebé asosia ho atividade petrolífera responsabiliza hosi Empreza Internasionál Petróleu (IOC).

Kontratu Fahe Produsaun (PSC) uluk-liu introduz iha Bolívia iha tinan 1950 liubá. Indonézia mak nu’udar pioneiru ba Kontratu Fahe Produsaun (PSC). Konseitu kontratu ne’e tempu ne'ebá iha Indonézia aplika uluk ba iha setór agrikultura. No tuir mai, adaptadu ba setór petrolífera iha tinan 1966 (Johnston, 1994). Hahú hosi ne’e, Kontratu Fahe Produsaun (PSC) implementa kedas iha nasaun ne’ebé sira-nia kondisaun ekonomia iha hela periodu tranzisaun nia laran. Data empirika hatudu katak entre tinan 1966 to’o 1998, totál Kontratu Fahe Produsaun (PSC) hamutuk 268 no implementa iha paíz 74 (Bindemann, 1999). Oras ne'e, iha nasaun 40 resin mak ativamente implementa Kontratu Fahe Produsaun (PSC), nasaun hirak ne’e inklui Angola; Vietnã, Líbia, Ejitu, Malázia, Peru, Síria, Filipina, Guiné Equatorial no nasaun seluk tan. Iha tinan hirak ikus ne'e, Kontratu Fahe Produsaun (PSC) mós  hahú uza iha nasaun sira ne’ebé halibur-an iha organizasaun CIS (Commonwealth of Independent States) hanesam Rusia, Azerbaijão no Cazaquistão (Mazeel, 2010). 

Objetivu prinsipál hosi rejime Kontratu Fahe Produsaun (PSC) ba governu mak atu atrai investimentu no kapta rendementu ekonómia masíma. Enkuantu objetivu prinsipál Kontratu Fahe Produsaun (PSC) hosi pontudevista kompañia petrolíferu nian mak atu maksimiza lukru (Tordo, 2007). Iha kontratu esplorasaun no produsaun petróleu ka PSC, iha nia prinsípiu fundamentál maka governu anfitriaun (HG) ka Empreza Nasionál Petróleu (National Oil Company-NOC) hodi nasaun nia naran sai nain ba rekursus petrolíferu, enkuantu kompañia petrolíferu nu'udar ajente ne'ebé disposta atu fornese kapitál, asume risku no fornese teknolojia ba iha atividade esplorasaun no produsaun petróleu.

Elementu prinsipál sira iha Kontratu Fahe Produsaun (PSC) inklui; realeza, kustus rekuperasaun, lukru petróleu no impostu. Mazeel (2010), klasifika elementu báziku rejime Kontratu Fahe Produsaun (PSC) ba estrutura fiskál rua maka; elementu operasionál no elementu fahe produsaun (production sharing). Elementu operasionál kompostu hosi; realeza, impostu, partisipasaun estadu no seluk tan enkuantu elementu fahe produsaun (production sharing) konsisti hosi fahe lukru petróleu no kustu rekuperasaun. Baze ba elementu báziku rua ne’e bazeia ba aspetu legál rua mak lejislasaun no akordu kontratuál.

Autór: Amandio Magno Lopes

Estudante Petroleum Management, DIT