PROSESU DEZEMVOLVEMENTU KAMPU GAS NO KONDENSADU GREATER SUNRISE

Mapa Kampu Greater Sunrise

Kampu gas no kondensadu Greater Sunrise kompostu husi área rua mak hanesan área Sunrise no Troubadour.  Kampu refere lokaliza maizomenus km 150 husi parte sudeste Timor-Leste no km 450 husi parte noroeste Darwin, Norte Teritóriu, Australia. Kampu Greater Sunrise deskobre iha tinan 1974 no kampu nee rasik asegura bruta rekursu kontinjente 100%, iha neebe kompostu husi rezerva gas 5,13 trillion cubic feet no kondensadu 225,9 millaun baril (MMbbl). Kompania Woodside mak nudar operador ba kampu refere no iha saham 33.44%. Tuir fali mak kompania Timor Gap E.P iha saham 56,56% no ikus liu kompania Osaka Gas hela ho saham10%.

Bazeia ba Akordu Unitizasaun Internasional (International Unitisation Agreement), maizomenus 21% husi kampu Greater Sunrise halo parte ba Joint Petroleum Development Area (JPDA). Nunee, kampu Greater Sunrise konjuntamente administra husi governu Australia no Timor-Leste. Restu 79% halo parte ba área tasi okos Australia nian no koluna be Indonesia nian.

Maibe, tanba Timor Leste ho Australia estabelese ona akordu foun kona ba fronteira marítima orizontal foin dadauk iha Nova Iorke  maka Akordu Unitizasaun Internasional (International Unitisation Agreement) sei la vale tan depois Parlamentu rua ratifika Akordu Delimitasaun Fronteira Maritima iha tempu besik.

Tuir akordu 6 Marsu 2018, neebe asina iha Nova Iorke, kampu Greater Sunrise tama iha rejime espesial. Tan nee, kona ba prosesu dezemvolvementu kampu refere sei iha negosiasaun kontinua entre governu Timor Leste ho kompania operador ho nia konsorsiu sira iha tempu besik. Alende nee, tuir akordu foun nee mos hateten katak kona ba ajustamentu fronteira lateral neebe besik reserva gas no kondensadu Greater Sunrise nian sei la ajusta hafoin rekursu gas no kondensadu Greater Sunrise nia komersiu remata.

Entertantu, kona ba konseitu dezemvolvementu kampu Greater Sunrise nian preve iha rejime espesial parte anexu B. Rekezitus rua kona ba konseitu dezemvolvementu kampu Greater Sunrise nian neebe preve iha dokumentu komprensivu ida ho naran “Comprehensive Package Agreement” datadu iha 30 Agostu 2017 mak hanesan tuir mai:

• Komersialmente dezemvolvementu kampu Greater Sunrise tenke viável no mos fo vantazem komersial. Nee signifika katak karik wainhira atu dezenvolve kampu Greater Sunrise maka kuantidade gas no kondensadu estimativa neebe potensialmente akumula iha kampu refere tenke ser maduru natoon ba dezenvolvimentu komersial no mos tenke  viável iha merkadu global. Alende nee, avaliasaun husi akumulasaun reserva nian tenke sufisiente atu avalia komersialidade ho klaru no mos rekuperasaun komersial labele depende ba teknolojia durante prosesu dezemvolvementu.
• Teknikamente dezemvolvementu kampu Greater Sunrise tenke “feasible”. Nee signifika katak karik wainhira atu dezemvolve kampu Greater Sunrise teknikamente tenke posivel nunee labele kauza kustu no risku neebe boot.

Ikus liu, hakarak konklui deit katak prosesu dezemvolvementu kampu Greater Sunrise sei komplikadu hela tanba kompania operador hakarak dada kadoras ba Darwin enkuantu governu Timor Leste insisti makaas atu dada kadoras mai Timor Leste. Tanba nee, kondisaun indispensável ba Timor Leste maka governu neebe mai tenke iha konsensu-orientadu hodi nunee kadoras Greater Sunrise bele dada mai Timor Leste. Karik laiha konsensu orientadu, maka diak  liu dada kadoras ba Darwin hodi evita kustu no risku neebe boot tanba Australia iha fasilidade infraestrutura neebe adekuadu.

Autór: Amandio Magno Lopes

Estudante Petroleum Management, DIT